Orta hesabla il ərzində 82 milyon turistin ziyarət etdiyi Fransa, gözəllikləri ilə turistləri cəlb edən ölkə olmaqdan əlavə, həm də təhsil sistemi ilə tələbələri cəlb edir. Fransa Respublikasında əhalinin, demək olar ki, 99 faizi oxuyub-yazmağı bilir. Ölkə ərazisində 2 milyona yaxın ali təhsil alan tələbə var və bu tələbələrin 12%-i xaricdən gələn tələbələrdir. Fransada ümumilikdə 3500 təhsil müəssisəsi mövcuddur ki, bunlardan 72-si universitetdir.

Təhsil pilləsi

Burada bakalavr, magistratura və doktorantura pillələrində istər fransız, istərsə də ingilis dilində təhsil almaq mümkündür. Fransada bakalavr pilləsi 3 ildir və pilləni tam bitirmək üçün 180 kredit tamamlanmalıdır.

Magistratura təhsili isə iki illikdir və iki cür olur: akademik magistratura və təcrübi magistratura. Əgər tələbə bakalavr ixtisasını davam etdirirsə bu halda təcrübi magistratura, lakin öz ixtisasını dəyişirsə bu halda birinci il akademik magistratura, ikinci il isə təcrübi magistratura oxuyur. Əyani təhsillə birgə onlayn təhsil imkanı da təklif edən Fransa bu mənada oxumaq istəyən tələbələrə əsl dəstək olur.

Dil

İngilis dilində təhsil alacağınız təqdirdə fransız dili biliyi tələb edilmir. Fransız dilində təhsil üçün isə DELF, TCF, DALF, TEF kimi sertifikatlardan birini əldə etmək lazımdır. Əksər hallarda fransız dilini B1, bəzən də B2 səviyyəsində bilmək kifayət edir.

Semester

Fransada tədris sentyabr-oktyabr aylarında başlayır və may-iyun aylarına kimi davam edir. Bizdə olduğu kimi Fransada da semester sonlarında imtahan verilir və tələbələrin nəticələri həmin imtahanlara əsasən müəyyən edilir.

Təhsil haqqı

Ölkə hər il təhsil sahəsinə böyük sərmayə yatırdığına görə burada təhsil haqqı kifayət aşağıdır. Bakalavr pilləsində dövlət universitetlərində illik təhsil haqqı 2700 avrodan başlayır. Özəl universitetlərdə təhsil haqqı 7000 avroya kimi qalxa bilir. Magistratura pilləsində isə 3700 avrodan başlayan təhsil haqqları mövcuddur.

Xanım Xəlilova

CELT Narimanov

xanim@celt.az

012-566-48-23

Leave a Reply

Your email address will not be published. Required fields are marked *

Yayınla